Үйл явдал
Ираны нийслэлд болсон халдлагын үеэр ахлах албан тушаалтан шархадсан гэх мэдээлэл гарлаа
Ираны нийслэл Тегеран хотод болсон халдлагын үеэр Ираны дээд зөвлөлийн ахлах гишүүн Камаль Харрази шархадсан байж болзошгүй талаар барууны хэвлэлүүд мэдээлжээ. Тодруулбал, Al Hadath телевизийн мэдээлэлд дурдсанаар тэрбээр халдлагын бай болсон бөгөөд бөмбөгдөлтийн үеэр хүнд шархадсан байж болзошгүй гэжээ.
Гэвч уг мэдээллийг Ираны албан ёсны байгууллагууд одоогоор батлаагүй байна.
Үүний зэрэгцээ Ираны дээд удирдлагатай холбоотой мэдээллүүд зөрүүтэй хэвээр байна. Гуравдугаар сарын 9-нд Иранд шинэ дээд удирдагч сонгогдсон тухай мэдээлэл гарч, талийгаач Али Хаменейн хоёр дахь хүү, 56 настай Можтаба Хаменей уг албан тушаалыг хашихаар болсон гэх мэдээлэл түгсэн юм.
Удалгүй шинэ дээд удирдагч Можтаба Хаменей халдлагад өртөн шархадсан гэх мэдээлэл гарсан ч Ираны төрийн тэргүүний хүү уг мэдээллийг няцаасан байна.
Харин удалгүй Ираны Гадаад хэргийн яамны төлөөлөгч Эсмаил Багаи шинэ дээд удирдагч Можтаба Хаменей шархадсан нь үнэн боловч биеийн байдал тогтвортой байгаа талаар мэдэгдсэн байна.
Гуравдугаар сарын 17-нд Ираны Гадаад хэргийн яам шинэ удирдагчийн биеийн байдал хэвийн байгаа бөгөөд ойрын хугацаанд олон нийтэд хандан мэдэгдэл хийхээр төлөвлөж буйг мэдээлжээ.
Түүнчлэн гуравдугаар сарын 20-нд АНУ-ын Үндэсний тагнуулын газрын тэргүүн Тулси Габбард Можтаба Хаменей ноцтой шархадсан байж болзошгүй талаар мэдэгдсэн нь нөхцөл байдлыг улам тодорхойгүй болгож байна.
Одоогоор Ираны удирдлагын эрүүл мэнд, аюулгүй байдлын талаарх мэдээллүүд зөрүүтэй хэвээр байгаа бөгөөд албан ёсны баталгаатай мэдээлэл хүлээгдэж байна.
Үйл явдал
ЦУОШГ: Ихэнх нутгаар их бороо орох тул үерийн аюулаас сэрэмжтэй байхыг анхааруулж байна
Өнөөдөр (2026.08.19) Булган, Орхон, Сэлэнгэ, Дархан-Уул аймгийн нутгаар их бороо орох тул голын усны түвшин нэмэгдэх, нөөлөг салхи, мөндөр, аянга цахилгаан, үерийн аюулаас сэрэмжтэй байхыг онцгойлон анхааруулж байна.
Иргэд, аялагч та бүхэн үер, усны аюулаас урьдчилан сэргийлж:
- Мэргэжлийн байгууллагаас өгч байгаа заавар, зөвлөмжийг дагаж мөрдөх
- Үерийн аюултай бүс, голын эрэг, хуурай сайр жалгаар зорчихгүй байх
- Тээврийн хэрэгслээр зорчихдоо баталгаат гүүр, гармаар зорчих
- Хүүхдийг гол, нуур, үерийн усны ойролцоо хараа хяналтгүй орхихгүй байх
- Үерийн эрсдэлтэй бүсэд буудаллах, майхан барихаас татгалзах
Цаг агаарын мэдээ, сэрэмжлүүлгийг тухай бүрт хүлээн авч, өөрийн болон гэр бүлийнхээ аюулгүй байдлыг хангахыг зөвлөж байна.
Үйл явдал
COP17-д хоол, хүнсний үйлчилгээ үзүүлж буй 30 байгууллагад зөвлөн тусалж байна
ХХААХҮЯ, НХХААГ, НМЭГ-ын улсын болон ахлах байцаагчид Цөлжилттэй тэмцэх тухай НҮБ-ын Конвенцын Талуудын 17 дугаар Бага хурал (COP-17)-ын хүрээнд Цэнхэр, Ногоон бүсэд үйл ажиллагаа явуулж буй 30 аж ахуйн нэгж, байгууллагын хоол үйлдвэрлэл, үйлчилгээний үйл ажиллагаанд энэ сарын 17-ны өдрөөс эхлэн зөвлөн туслаж ажиллаж эхэллээ.
Тухайлбал, улсын байцаагчид хоол хүнсний чанар, аюулгүй байдал, хүнсний түүхий эд, бүтээгдэхүүний хадгалалт, хэрэглэх хугацаа, хоол үйлдвэрлэлийн технологийн үйл ажиллагаа, хадгалалтын температурын горим, тоног төхөөрөмж, багаж хэрэгслийн цэвэрлэгээ, халдваргүйтгэл, ажилтнуудын хувийн болон үйлдвэрлэлийн эрүүл ахуй нөхцөл байдал чиглэлээр зөвлөн тусалж байна.
Мөн Катерингийн үйлчилгээний хүрээнд бэлэн хоол, хүнсний бүтээгдэхүүн тээвэрлэж буй авто тээврийн хэрэгслийн эрүүл ахуй, ариун цэвэр, температурын горим, тээвэрлэлтийн нөхцөл, түүнчлэн лац ломбын бүрэн бүтэн байдлыг шалгаж, аюулгүй байдлыг хангуулах, илэрсэн зөрчил, дутагдлыг газар дээр нь арилгуулах, хүнсний аюулгүй байдал, эрүүл ахуйн шаардлагыг хангах талаар мэргэжил, арга зүйн зөвлөгөө өгч, хэрэгжилтийг хангуулан ажиллаж байна.
Үйл явдал
ОБЕГ НҮБ-Хабитаттай хот суурин газрын гамшгийн эрсдэлийг бууруулах чиглэлээр хамтарна
Онцгой байдлын ерөнхий газрын дарга, хошууч генерал Г.Ариунбуян COP17-д оролцож буй НҮБ-ын Хүн амын нутагшил, суурьшлын хөтөлбөрийн Ази, Номхон далайн бүсийн төвийн хөтөлбөрийн ажилтан Рой Кититэй хоёр талт уулзалт хийлээ.
Уулзалтаар хот суурин газрын гамшгийн эрсдэлийг бууруулах, иргэдийн гамшгийг даван туулах чадавхыг бэхжүүлэх, болзошгүй эрсдэлээс хамгаалах чиглэлээр хамтын ажиллагаагаа өргөжүүлэх талаар санал солилцжээ.
Түүнчлэн НҮБ-Хабитат хөтөлбөртэй хамтран хот суурин газрын гамшгийн эрсдэлийг бууруулах чиглэлээр шинэ төсөл, хөтөлбөр хэрэгжүүлэх боломжийг хэлэлцсэн байна.
Хошууч генерал Г.Ариунбуян Монгол Улсын Онцгой байдлын байгууллага болон НҮБ-ын хамтын ажиллагаа 2004 оноос эхлэлтэйг уулзалтын үеэр онцолжээ. Тухайн үед Монгол Улсын Засгийн газрын хүсэлтээр НҮБ-ын Гамшгийн үнэлгээ, зохицуулалтын баг Монгол Улсад ажиллаж, гамшиг, осолтой тэмцэх үндэсний чадавхад хөндлөнгийн үнэлгээ хийсэн байна.
Өдгөө Онцгой байдлын байгууллага НҮБ-ын Монгол дахь Суурин зохицуулагчийн газар болон НҮБ-ын төрөлжсөн байгууллагуудтай гамшгийн эрсдэлийг бууруулах, гамшгийн хор уршгийг арилгах, хүмүүнлэгийн тусламж үзүүлэх чиглэлээр хамтран ажиллаж байгаа юм.
Энэ удаагийн уулзалтаар талууд хамтын ажиллагааг хотын гамшигт тэсвэртэй байдлыг нэмэгдүүлэх, иргэдийн бэлэн байдлыг сайжруулах бодит төсөл, хөтөлбөрөөр өргөжүүлэх боломжийг онцлон хэлэлцжээ.
