Дэлхий нийтээр..
Мөнгө угаахтай тэмцэх зах зээл 2025 онд 1.99 тэрбум доллараар үнэлэгдэнэ
Дэлхийн мөнгө угаахтай тэмцэх зах зээлийн хэмжээ 2025 он гэхэд 1.99 тэрбум долларт хүрч, 2019-2025 оны урьдчилсан тооцоотой харьцуулахад жилийн өсөлтийн түвшин 13.6% болох таамаглалыг Миллион инсайтс байгууллагын гаргасан тайланд дурджээ. Хууль сахиулах үйл ажиллагаатай хавсаруулсан нөхцөлд мөнгө угаахаас урьдчилан сэргийлэх, илрүүлэх ажиллагаа амжилттай хэрэгжиж байгаа ба тиймээс авлигачид, гэмт хэрэгтнүүд хууль бус хөрөнгийнхөө эх үүсвэрийг нуун дарагдуулахад ихээхэн анхаарал хандуулж байна.
Терроризм, авлига, зохион байгуулалттай гэмт хэрэг нэмэгдэж, дэлхийн аюулгүй байдал, энх тайван, хөгжилд сөргөөр нөлөөлж байгаагийн улмаас засгийн газрын зүгээс цогц арга хэмжээг авч хэрэгжүүлэх болсон. Тиймээс засгийн газраас тогтоосон хэм хэмжээг хангахын тулд аж ахуйн нэгжүүд мөнгө угаах, залилан мэхлэх гэмт хэргээс урьдчилан сэргийлэх, илрүүлэх шийдлийг гаргах шаардлага тулгарсан. Тухайлбал, авлигачид болон цахим гэмт хэрэгтнүүдийн үйл ажиллагааг хянах журмыг боловсруулж, хууль бус орлого олсон хөрөнгийг нуух эсвэл хөрвүүлэхийг багасгахад туслахаар төлөвлөж байна.
Мөнгө угаахтай тэмцэх арга хэмжээнүүд нь мөнгө угаах аливаа гүйлгээ болон нэрээ нууцалсан гүйлгээ хийх эрсдэлийг бууруулахад засгийн газарт тусалдаг. Энэхүү арга хэмжээ нь хүний наймаа, хүн хил дамжуулан худалдаалах хэрэг, хар тамхины наймаа, хар тамхи хил давуулах гэмт хэрэг гэх мэт мөнгөнд суурилсан үйл ажиллагааг бууруулдаг. Түүнчлэн мөнгө угаахтай тэмцэх арга хэмжээ нь хил дамнасан гүйлгээ, цахим валютаар хийгдэх авлигад тулгарах аюулыг ч мөн бууруулдаг.
Онлайн банкны платформ, P2P арилжаа, онлайн төлбөрийн вэбсайт зэрэг дэвшилтэт технологи гарч ирсэнтэй холбогдуулан сүүлийн хэдхэн жилд дэлхий даяар цахим гүйлгээний тоо өссөн байна. Эдгээр хөгжил дэвшлийн улмаас хоёр талын хооронд мөнгө шилжүүлэхэд хялбар болсон боловч энэ байдал нь хууль бусаар мөнгө шилжүүлэх янз бүрийн арга замыг тодорхойлох, илрүүлэхэд илүү төвөгтэй байдал үүсгэсэн. Түүнчлэн гэмт хэрэгтнүүд прокси сервер эсвэл нэрээ нууцлах програм ашиглан IP хаяггүйгээр мөнгө шилжүүлж эсвэл татан авч байна. Тиймээс мөнгө угаах гэмт хэргийг мөрдөх, илрүүлэх нь маш хэцүү болж байгаа юм.
Санхүүгийн байгууллага болон бизнес эрхлэгчдийг дээрх аюулаас хамгаалахын тулд томоохон улс орнууд мөнгө угаахтай тэмцэх шаардлагыг санхүүгийн байгууллагууд хэрэгжүүлэхийг шаардсан.
Үүнээс гадна олон засгийн газар санхүүгийн гэмт хэргийг мэдээлэх, илрүүлэхэд финтек (FinTech) арга замыг ашиглахад анхаарах болсон. Санхүүгийн гэмт хэрэг, хууль бус худалдааны үйл ажиллагааны давтамж нэмэгдэж байгаатай холбогдуулан хуучин арга замаар аюулгүй байдлыг хангах боломжгүй гэж үзсэн тул аж ахуйн нэгжүүд дэвшилтэт технологийг нэвтрүүлж байна.
Түүнчлэн дэвшилтэт технологийг нэвтрүүлснээр мэдээллийн аюулгүй байдал болон санхүүгийн үйл ажиллагааны ил тод байдал улам бүр нэмэгдсэн. Тиймээс ухаалаг гар утас, биометрик, зан үйлийн анализ зэрэг технологи нь мөнгө угаахтай тэмцэх зах зээлийг ойрын хэдэн жилд нэмэгдүүлэх хандлагатай байна.
Эх сурвалж: prnewswire.co.uk
Дэлхий нийтээр..
Оросын довтолгоонд хоёр хүн амиа алдаж, Украин хариу цохилт өглөө
2026 оны дөрөвдүгээр сарын 19-ний шөнө Украинд Оросын дрон довтолгооны улмаас наад зах нь хоёр хүн амиа алдаж, хэд хэдэн хүн шархадсан талаар албаны эх сурвалжууд мэдээллээ.
Украины Чернигов хотод болсон шөнийн довтолгооны үеэр 16 настай хүү амиа алдаж, дөрвөн хүн шархадсан бол орон сууцны барилгууд галд өртсөнийг орон нутгийн захиргаа онцоллоо. Мөн Херсон хотод дрон тээврийн хэрэгсэлд цохилт өгсний улмаас нэг хүн нас барж, өөр нэг хүн шархадсан байна.
Украины Агаарын цэргийн хүчний мэдээлснээр Оросын тал нэг шөнийн дотор нийт 236 дрон харваснаас 203-ыг нь устгасан ч үлдсэн хэсэг нь хэд хэдэн байршилд онож, хохирол учруулжээ.
Үүний зэрэгцээ Украин хариу цохилт өгч, ОХУ-ын Таганрог хот дахь дрон үйлдвэрлэлийн үйлдвэрийг онилон цохилт өгсөн талаар цэргийн удирдлага мэдэгдэв. Уг ажиллагааны үеэр гал гарч, аж үйлдвэрийн дэд бүтцэд хохирол учирсныг албаныхан дурдлаа.
Шинжээчдийн үзэж буйгаар хоёр тал харилцан дрон ашигласан довтолгоог эрчимжүүлж буй нь дайны шинэ шатанд шилжиж буйн илрэл бөгөөд иргэний дэд бүтэц, энгийн иргэдэд учрах эрсдэл нэмэгдэж байгааг анхааруулж байна.
Дэлхий нийтээр..
АНУ Ормузын хоолойд Ираны хөлгийг саатуулж, хяналтдаа авлаа
АНУ-ын Ерөнхийлөгч Дональд Трамп өөрийн сошиал хуудсанд нийтлэхдээ АНУ-ын тэнгисийн явган цэргүүд 2026 оны дөрөвдүгээр сарын 19-ний өдөр Ираны далбаатай ачааны хөлгийг саатуулж, хяналтдаа авсан талаар мэдэгдэв.
Түүний мэдээлснээр уг хөлөг Ормузын хоолойд хэрэгжиж буй АНУ-ын тэнгисийн хоригийг зөрчин нэвтрэхийг оролдсон бөгөөд анхааруулгыг үл тоомсорлосны дараа АНУ-ын Тэнгисийн цэргийн хүч хөлгийг саатуулжээ.
АНУ-ын талын мэдээлснээр тус хөлгийг саатуулах явцад тэнгисийн цэргийн хөлөг онгоц хөдөлгүүрийн хэсэгт нь чиглэсэн гал нээсний дараа ажиллагааг зогсоож, улмаар тэнгисийн явган цэргүүд хөлөгт нэвтэрч хяналт тогтоосон байна.
Одоогийн байдлаар Ираны талаас уг үйл явдалд шууд тайлбар өгөөгүй байгаа ч зарим эх сурвалжид уг ажиллагааг буруушааж, хариу арга хэмжээ авах боломжтойг илэрхийлсэн талаар мэдээлжээ.
Энэхүү үйл явдал нь дөрөвдүгээр сарын 13-наас хэрэгжиж эхэлсэн АНУ-ын тэнгисийн хоригийн хүрээнд хүч хэрэглэсэн анхны тохиолдол болж байгаа бөгөөд бүс нутгийн хурцадмал байдлыг нэмэгдүүлэх эрсдэлтэй гэж ажиглагчид үзэж байна.
Одоогоор Ираны талаас уг үйл явдалд албан ёсны тайлбар хийгээгүй байна.
Дэлхий нийтээр..
НҮБ дайн үргэлжилбэл дэлхийд өлсгөлөн нэмэгдэх эрсдэлтэйг анхааруулав
НҮБ-ын Дэлхийн хүнсний хөтөлбөр (WFP)-өөс 2026 оны дөрөвдүгээр сарын 16-ны өдөр гаргасан мэдэгдэлд дурдсанаар, Ойрхи Дорнодын бүс нутагт үүсээд буй хурцадмал байдал, ялангуяа Ирантай холбоотой зөрчил үргэлжилбэл дэлхийн хэмжээнд нэмэлт 45 сая хүн хурц өлсгөлөнд нэрвэгдэх эрсдэлтэй байгааг анхааруулжээ.
Энэ талаар НҮБ-ын Дэлхийн хүнсний хөтөлбөрийн Гүйцэтгэх захирал Синди Маккейн анхааруулахдаа, геополитикийн хурцадмал байдал нь дэлхийн хүнсний аюулгүй байдалд ноцтой дарамт учруулж байгааг онцолсон байна.
Тус байгууллагын мэдээлснээр, дайн, зөрчил нь зөвхөн тухайн бүс нутагт төдийгүй дэлхийн хүнсний хангамж, тээвэр логистик, эрчим хүчний зах зээлд шууд болон дам нөлөө үзүүлж байгаа аж. Үүний улмаас хүнсний бүтээгдэхүүний үнэ өсөх, нийлүүлэлт тасалдах, эмзэг эдийн засагтай орнуудын худалдан авах чадвар буурах зэрэг сөрөг үр дагавар нэмэгдэх төлөвтэй байна.
Одоогийн байдлаар дэлхий даяар хэдийнэ олон сая хүн хүнсний хомсдолд өртөөд байгаа бөгөөд дээрх нөхцөл байдал үргэлжилбэл энэ тоо цаашид огцом нэмэгдэх эрсдэлтэйг НҮБ онцолсон байна. Иймд олон улсын хамтын нийгэмлэгийг зөрчлийг намжаах, хүмүүнлэгийн тусламжийг нэмэгдүүлэх, хүнсний хангамжийг тогтвортой байлгахад анхаарахыг уриалжээ.
Шинжээчдийн үзэж буйгаар, геополитикийн тогтворгүй байдал нь дэлхийн эдийн засаг, ялангуяа хүнсний аюулгүй байдалд мэдэгдэхүйц нөлөө үзүүлж байгаа бөгөөд ойрын хугацаанд энэ чиг хандлага үргэлжлэх төлөвтэй байна.
