Дэлхий нийтээр..
Сэлэнгэ аймагт самар түүх зорилгоор очсон иргэдийг буцаах ажлыг зохион байгуулж байна
11 дүгээр сарын 24-ний өдрийн аймгийн Онцгой комиссын мэдээллийг аймгийн Онцгой комиссын дарга бөгөөд аймгийн Засаг дарга Ш.Оргил өглөө.
Ээлжит мэдээллээ та бүхэндээ хүргэе.
Сэлэнгэ аймгийн хэмжээнд нөхцөл байдал амаргүй хэвээр байна гэдгийг мэдээллийнхээ эхэнд онцлон хэлье. 3 суманд тахалын тохиолдол илэрч батлагдсан. Эдгээр сумдын онцгой комиссууд, төрийн албан хаагчид энэ аюулын голомтыг илрүүлэх, цааш тархахаас урьдчилан сэргийлэх бүхий л арга хэмжээнүүдийг цаг алдалгүй авахын төлөө 24 цагаар ажиллаж байна.
Та бүхэн сая 11.00 цагийн улсын мэдээгээр Сэлэнгэ аймагт 124 тохиолдол бүртгэгдсэнийг сонссон байх. Нийт батлагдсан 124 тохиолдлын 47 иргэнийг түргэвчилсэн болон вирусын /PCR/ шинжилгээгээр, 77 иргэнийг ойрын хавьтлаас тандалт судалгаа, шинжилгээгээр илрүүлсэн. Эндээс харахад тохиолдлын ихэнх нь анхны тохиолдлуудын ойрын буюу 1 дүгээр хавьтагчид, тэдгээрийн ойр тойрны хүмүүс байна. Дээрх тохиолдлуудыг сумдаар нь тодруулж хэлбэл Сүхбаатар суманд 119 тохиолдол, Мандал суманд 3 тохиолдол, Алтанбулаг суманд 2 тохиолдол тус тус батлагдаж ХӨСҮТ-д эмчилгээнд шилжээд байна. Шинээр илэрч батлагдсан 26 тохиодол бүгд Сүхбаатар суманд батлагдсан. Бид Сүхбаатар суманд орох, гарах хөдөлгөөнийг бүрэн зогсоосон дэглэмийг хэвээр үргэлжлүүлж байна.
Сүхбаатар, Мандал сумдад 279 иргэн тусгаарлалтад байна.
Бусад сумдад ч хөл хорионы хатуу дэглэм хэвээр үргэлжилж байна. Сэлэнгэ аймаг 17 сум, 6 тосгонтой. 23 томоохон суурьшлын бүсүүдтэй. Бид зөвхөн тохиолдол бүртгэгдсэн 3 сумандаа анхаарал тавихаас гадна магадлал өндөртэй төмөр замын өртөө, зөрлөгүүдтэй Баянгол, Сайхан сум, бусад сумдад тандалт судалгааны ажлыг бас хийж байна.
Тухайлбал: өчигдөр Сүхбаатар сумын 5,6,7 дугаар багуудад түргэвчилсэн шинжилгээ авах 15 байршилд шинжилгээ авлаа. Өнөөдөр Сүхбаатар сумын 4, 8 дугаар багуудад шинжилгээ авах 10 баг ажиллаж байна.
Мөн УБТЗ-ын Сүхбаатар зангилааны нийт 657 ажилчдаас 430 ажилчдыг вирусын /PCR/ шинжилгээнд хамрууллаа. Өнөөдөр үлдсэн 227 ажилчдыг бүрэн хамруулахаар ажиллаж байна. Тиймээс иргэд та бүхэн шинжилгээндээ хамрагдаж иргэнийхээ журамт үүргээ биелүүлэхийг анхааруулж байна.
Та бүхэндээ дахин дахин хэлэхэд энэ бол хэнд ч хэлж ирдэггүй, хийсч ирдэг аюулт өвчин болохоос гэмт хэрэг биш. Та бүхэн айж, ичиж зовох шаардлага байхгүй шүү гэдгийг онцлон хэлье.
Нийт иргэд та бүхэн гэрийн дэглэмээ сахиж, ариутгал халдваргүйжүүлэлтээ сайн хийж сонор сэрэмжтэй байгаарай.
Аймгийн хэмжээнд ариутгалын ажил тогтмол хийгдэж байна. Зоонозын өвчин судлалын төв төмөр замын тээвэр зуучийн барилга байгууламжид ариутгал халдваргүйжүүлэлт тогтмол хийж, орох, гарах хөдөлгөөнийг хязгаарлан цагдаагийн харуул хамгаалалт ажиллаж байна. Аймгийн хэмжээнд голомтын болон урьдчилан сэргийлэх чиглэлээр 659.9 мянган мкв талбайд халдваргүйжүүлэлт хийлээ.
Сэлэнгэ аймгийн Хүдэр, Мандал, Ерөө суманд самар түүх зорилгоор очсон иргэдийг тухайн бүс нутагт нь цагдаа, хяналтын байгууллагын харуул хамгаалалттайгаар түргэвчилсэн оношлуураар шинжилгээг хийж, буцаах ажлыг зохион байгуулж байна.
Улсын Онцгой комиссын шийдвэрээр ОХУ-ын талд байгаа 93 олон улсын ачаа тээврийн хэрэгслийг хилийн боомтоор татан нэвтрүүлэх ажлыг холбогдох мэргэжлийн байууллагатай хамтран зохион байгуулахаар бэлтгэл ажлыг хангуулж байна.
Сүхбаатар төмөр замын шалган нэвтрүүлэх боомтоор орох чиглэлд 8 гал тэрэг, 123 вагон, 3 ажилтан, гарах чиглэлд 6 галт тэрэг, 183 вагон, 4 ажилтан тус тус улсын хилээр нэвтэрлээ.
Дэлхий нийтээр..
Кушнер: Газын зурвасыг цэрэггүйжүүлэх үйл явц 30 хоногийн дотор эхэлж магадгүй
АНУ-ын Ерөнхийлөгч Дональд Трампын тусгай элч Жаред Кушнер Газын зурвасыг цэрэггүйжүүлэх үйл явцад ойрын 30 хоногт бодит ахиц гарч магадгүй гэж мэдэгдлээ.
Кушнер наймдугаар сарын 17-нд Израилийн Ерөнхий сайд Биньямин Нетаньяхутай Иерусалимд уулзсаныхаа дараа Fox News-т ярилцлага өгөхдөө эхний ээлжид зэвсгийг ашиглалтаас гаргах ажиллагаа эхэлж, дараагийн 60-90 хоногт газар доорх хонгилуудыг хаах ажил урагшилна гэж найдаж байгаагаа илэрхийлжээ.
Кушнер Израильд очихоосоо өмнө Египетэд ХАМАС-ын удирдлагын төлөөлөлтэй уулзсан байна. Тэрбээр ХАМАС зэвсгээ хураалгахтай холбоотой амлалтаа бодит үйлдлээр харуулах шаардлагатайг мэдэгдсэн бөгөөд эс биелүүлбэл Израиль цэргийн ажиллагаагаа үргэлжлүүлэхэд АНУ болон бусад түншээс илүү хүчтэй дэмжлэг авах болно гэж анхааруулжээ.
АНУ-ын дэвшүүлсэн төлөвлөгөөнд Газын зурвасыг цэрэггүйжүүлэх, ХАМАС-ын зэвсгийг хураах, цэргийн зориулалттай дэд бүтэц болон хонгилуудыг устгах асуудал багтаж байгаа юм. Гэвч уг төлөвлөгөөг хэрэгжүүлэх дарааллын талаар талуудын байр суурь зөрүүтэй хэвээр байна.
Израилийн тал ХАМАС бүрэн зэвсгээ хураахаас өмнө Газын зурвасаас цэргээ гаргахгүй гэсэн байр суурьтай байгаа бол ХАМАС Израилийн цэргийн ажиллагааг зогсоож, цэргээ татах асуудлыг эн тэргүүнд тавьж байна. Кушнерийн хоёр өдрийн уулзалтуудын дараа ч энэ үндсэн зөрүүг арилгасан тохиролцоонд хүрээгүй гэж Reuters мэдээлжээ.
Кушнер мөн Газын зурвасыг цэрэггүйжүүлэхээс өмнө өргөн хүрээний сэргээн босголтыг эхлүүлэхгүй гэсэн АНУ-ын байр суурийг илэрхийлсэн байна. Үүний зэрэгцээ Израильд бодит аюул тулгарсан нөхцөлд өөрийгөө хамгаалах эрхийг нь АНУ хязгаарлахгүй гэж мэдэгджээ.
Уулзалтын үр дүнд Газын зурвасын аюулгүй байдал, зэвсэг хураах асуудал, мөн дэд бүтэц, нийгмийн эрүүл мэндийн асуудал хариуцах хоёр ажлын хэсэг байгуулахаар тохирсон ч энхийн төлөвлөгөөг хэрэгжүүлэх талаар талууд эцсийн тохиролцоонд хүрээгүй байна.
Дэлхий нийтээр..
Иран АНУ-ын цэргийг Ормузын хоолой, Персийн буланд нэвтрүүлэхгүй гэв
Ираны Зэвсэгт хүчний Ерөнхий командлагч Амир Хатами АНУ-ын цэргийн хүчнийг Персийн булан, Оманы булан болон Ормузын хоолойн бүсэд эргэн байршихыг Иран зөвшөөрөхгүй гэж мэдэгджээ.
Хатами наймдугаар сарын 16-нд Тегеранд болсон арга хэмжээний үеэр сэтгүүлчидтэй уулзахдаа АНУ-ын цэргийн хүчийг бүс нутгаас шахан гаргах нь нэгэнт бодит болсон гэж мэдэгдсэн байна. Тэрбээр АНУ-ын цэргийн бааз, хүчний байрлал өмнөх байдалдаа эргэн орох боломжгүй бөгөөд Иран үүнийг зөвшөөрөхгүй гэсэн байр суурь илэрхийлжээ.
Энэ мэдэгдэл АНУ-ын Ерөнхийлөгч Дональд Трамп Ормузын хоолойн хяналтын талаар удаа дараа хатуу байр суурь илэрхийлж буй үед гарч байна. Трамп наймдугаар сарын 12-нд АНУ Ормузын хоолойг “бүрэн хянаж байгаа” гэж мэдэгдсэн бол наймдугаар сарын 14-нд Ираныг ялсны дараа тус хоолойг АНУ-ын нутаг дэвсгэр болгон зарлах тухай ярьсан юм.
Хатами Трампын мэдэгдлийг няцааж, Ормузын хоолой дахь Ираны байр суурийг хамгаална гэдгээ илэрхийлжээ. Түүний мэдэгдэлд АНУ-ын цэргийн хүч бүс нутагт эргэн байрших аливаа оролдлогод Иран хатуу хариу үзүүлнэ гэсэн агуулга багтсан байна.
Түүнчлэн Хатами АНУ-ын цэргийн алба хаагчийг байлдааны нөхцөлд хөнөөсөн эсвэл олзолсон тохиолдолд 30 мянган ам.долларын шагнал олгохоо мэдэгдсэн байна. Ираны төрийн мэдээллийн хэрэгслүүдийн мэдээлснээр шагналын хөрөнгийг иргэдийн хандиваар бүрдүүлэх бөгөөд эмэгтэй хүн ийм үйлдэл хийсэн тохиолдолд шагналыг хоёр дахин нэмэгдүүлж, 60 мянган ам.доллар болгоно гэжээ.
Ормузын хоолойн хяналт АНУ, Ираны хоорондын сөргөлдөөний гол асуудлын нэг хэвээр байна. Трампын засаг захиргаа АНУ-ын Тэнгисийн цэргийн хүчин хоолойг хянаж байгаа гэж мэдэгдэж байгаа бол Ираны тал стратегийн усан зам дахь өөрийн байр суурийг хадгалсаар байна. Наймдугаар сарын 18-ны байдлаар ч талуудын байр суурь зөрүүтэй хэвээр бөгөөд Ормузын хоолойн хөдөлгөөн бүрэн хэвийн болоогүй байна.
Дэлхий нийтээр..
Путин гадаадад гарч, ял шийтгэлээс зайлсхийсэн иргэдийн хөрөнгийг битүүмжлэх хуульд гарын үсэг зуржээ
ОХУ-ын Ерөнхийлөгч Владимир Путин гадаадад байгаа бөгөөд Оросын шүүхээс оноосон ял шийтгэлээс зайлсхийж буй иргэдэд тодорхой хязгаарлалт тогтоох тухай хуульд 2026 оны зургаадугаар сарын 10-нд гарын үсэг зуржээ. Шинэ хууль 2026 оны есдүгээр сарын 1-нээс хүчин төгөлдөр хэрэгжиж эхэлнэ.
Шинэ зохицуулалтаар гадаадад байгаа ОХУ-ын иргэн хуульд заасан тодорхой гэмт хэрэгт холбогдож, шүүхийн шийдвэрийг биелүүлэхээс зайлсхийсэн тохиолдолд түүний ОХУ дахь хөрөнгө, эд хөрөнгийг битүүмжлэх болон бусад хязгаарлалт хэрэглэх эрх зүйн боломж бүрдэж байна.
Хууль нь ОХУ-аас гадаадад гарсан бүх иргэнийг хамруулахгүй. Мөн Украины дайн эхэлснээс хойш эх орноосоо явсан хүмүүсийг нийтээр нь иргэншлээс хасах зохицуулалт биш юм.
Харин гадаадад байгаа бөгөөд ОХУ-ын хууль тогтоомжид заасан тодорхой гэмт хэрэгт холбогдсон, шүүхийн ажиллагаа болон оноосон шийтгэлээс зайлсхийж буй иргэдэд дотоодод байгаа хөрөнгө, эд хөрөнгөөр нь дамжуулан хязгаарлалт тавих боломжийг өргөжүүлжээ.
Уг хуулийг ОХУ-ын Төрийн Дум тавдугаар сарын 26-нд баталж, Холбооны зөвлөл зургаадугаар сарын 3-нд дэмжсэн бөгөөд Ерөнхийлөгч Владимир Путин зургаадугаар сарын 10-нд гарын үсэг зурсан юм. Хуулийн үндсэн зохицуулалтууд есдүгээр сарын 1-нээс хэрэгжиж эхлэхээр тусгажээ.
ОХУ 2022 онд Украинд цэргийн ажиллагаа эхлүүлснээс хойш олон тооны иргэн гадаадад гарсан бөгөөд Москва гадаадад байгаа Оросын иргэдийн хууль зүйн хариуцлагатай холбоотой зохицуулалтаа үе шаттайгаар чангатгаж ирсэн юм.
Гэхдээ гадаадад амьдарч байгаа явдал өөрөө хариуцлага хүлээлгэх үндэслэл болохгүй бөгөөд хуульд заасан гэмт хэрэг, шүүхийн ажиллагаанаас зайлсхийсэн зэрэг тодорхой нөхцөл бүрдсэн тохиолдолд шинэ зохицуулалтыг хэрэглэхээр байна.
