Дэлхий нийтээр..
Үйлдвэржилтийн бодлогын байнгын хорооны дарга, гишүүд “Эрдэнэт үйлдвэр” ТӨҮГ-т ажиллав
Үйлдвэржилтийн бодлогын байнгын хорооны дарга, гишүүд албан томилолтынхоо хоёр дахь өдрийг /2022.10.11/ “Эрдэнэт үйлдвэр” ТӨҮГ-ын үйл ажиллагаатай танилцсанаар эхлүүллээ.
Үйлдвэрийн удирдлагууд хөрөнгө оруулалт, бүтээн байгуулалтын ажлууд болон Үйлдвэрлэл, технологийн парк байгуулах төлөвлөлтийн талаар танилцууллаа. Үйлдвэрлэл, технологийн паркийн ТЭЗҮ-ийг боловсруулж батлуулсан бөгөөд одоо зураг төсөл, байгаль орчинд нөлөөлөх байдлын үнэлгээ хийгдэж байгаа аж. Мөн уул уурхай-металлурги-химийн үйлдвэрийн цогцолбор байгуулах зориулалтаар 1217 га газрыг улсын тусгай хэрэгцээнд авч, цахилгаан, дулаан, уур, усан хангамж, төмөр болон авто зам, ариутгах татуурга, бохир усны өргөтгөлийн станц зэрэг дэд бүтцийн байгууламжуудын зураг төслийг боловсруулж, холбогдох байгууллагуудаар батлуулсан байна.
“Эрдэнэт үйлдвэр” ТӨҮГ-ын ерөнхий захирал Г.Ёндон “Өнгөт металлургийн салбарын суурь Эрдэнэтэд байх ёстой. Зэсийн баяжмалын үйлдвэр мэргэшсэн боловсон хүчинтэй, ажиллах хүчний том нөөц учир энэ үйлдвэрээ түшиглэн нэмүү өртөг шингэсэн эцсийн бүтээгдэхүүн үйлдвэрлэж, цаашид эрэлт хэрэгцээ нь өсөн нэмэгдэж буй өндөр технологийн түүхий эд болох зэс нунтаг, зэс ялтас, зэс кабель, хоолой, цахилгаан тоног төхөөрөмж, эд анги, сэлбэг хэрэгсэл үйлдвэрлэх төр, хувийн хэвшлийн түншлэлийг хөгжүүлэх нь өндөр ач холбогдолтой. 2050 он гэхэд дэлхийн зэсийн хэрэглээ гурав дахин өснө. Үүнд бид бэлтгэх ёстой” хэмээн танилцуулгынхаа үеэр онцоллоо.
УИХ-ын Үйлдвэржилтийн бодлогын байнгын хорооны дарга, гишүүд үйлдвэрлэлийн бүтээмжийг өсгөж, валютын урсгалыг нэмэгдүүлэхэд чиглэсэн хөрөнгө оруулалт, бүтээн байгуулалтыг эрчимжүүлэх хэрэгтэйг дурдаад, зэсийн баяжмал хайлуулах, боловсруулах үйлдвэр барьж байгуулах, Засвар механикийн заводын өргөтгөлийн төслийг тэргүүн эгнээнд хэрэгжүүлэх зөвлөмж өглөө. Харин исэлдсэн хүдрийг нуруулдан уусгах технологиор катодын зэс үйлдвэрлэх чиглэлд хувийн хэвшлийн манлайлал дээр хамтарч ажиллах, төр, хувийн хэвшлийн түншлэлийг сайжруулах санал дэвшүүлсэн. “Эрдэнэт” үйлдвэрийн удирдлагууд эрчим хүчний эх үүсвэрийг нэмэгдүүлэх, үйлдвэрийн бүтээгдэхүүний экспорт, технологийн материал, тоног төхөөрөмжийн импорт, тээврийг жигд найдвартай хангахад УИХ-ын Үйлдвэржилтийн бодлогын байнгын хорооны гишүүд анхаарал хандуулж ажиллахыг хүссэн юм.
Монгол Улсын төсвийн орлого бүрдүүлэхэд тус үйлдвэрийн зэсийн баяжмалын экспорт чухал үүрэг гүйцэтгэдэг. Одоогийн байдлаар зэсийн баяжмалын ачилт тээвэрлэлт вагоны хангалтаас хамааран хоногт 30 вагоноор нийлүүлж байгаа нь бүтээгдэхүүний борлуулалт удаашрахад хүргэж буй юм.Тус үйлдвэрийн агуулахад 15 мянган тонн зэсийн баяжмалын үлдэгдэлтэй байгаа аж. “Эрдэнэт үйлдвэр” ТӨҮГ-ын ерөнхий захирал Г.Ёндон вагоны тоог нэмэгдүүлж доод тал нь 35 болгох тал дээр анхааран ажиллахыг Байнгын хорооны даргаас хүслээ.
Байнгын хорооны дарга Т.Энхтүвшин энэ тал дээр онцгой анхаарч холбогдох байгууллагатай ярилцаж, түргэн хугацаанд шийдвэрлэх болно гэдгээ илэрхийллээ.
Дараа нь “Эрдэнэт” үйлдвэрийн олборлолт ашиглалтын явцад бий болсон технологийн бус исэлдсэн хүдрийн овоолгуудыг түшиглэн байгуулагдсан катодын цэвэр зэс, зэс утас үйлдвэрлэгч “Эрдмин” болон “Зэс эрдэнийн хувь” компанийн үйл ажиллагаатай танилцав.
“Эрдмин” компанийн хувьд татварын бодлого, дэмжлэг хэрэгтэй байгаа гэж байлаа. Харин “Зэс эрдэнийн хувь” компанийн хувьд үйлдвэрийн бүтээн байгуулалт 95 хувийн гүйцэтгэлтэй байгаа аж. Ирэх долоо хоногт анхныхаа бүтээгдэхүүнийг гаргаж эхлэхээр төлөвлөн ажиллаж байгаагаа танилцуулав хэмээн Улсын Их Хурлын Хэвлэл мэдээлэл, олон нийттэй харилцах хэлтсээс мэдээлэв.
Дэлхий нийтээр..
Кушнер: Газын зурвасыг цэрэггүйжүүлэх үйл явц 30 хоногийн дотор эхэлж магадгүй
АНУ-ын Ерөнхийлөгч Дональд Трампын тусгай элч Жаред Кушнер Газын зурвасыг цэрэггүйжүүлэх үйл явцад ойрын 30 хоногт бодит ахиц гарч магадгүй гэж мэдэгдлээ.
Кушнер наймдугаар сарын 17-нд Израилийн Ерөнхий сайд Биньямин Нетаньяхутай Иерусалимд уулзсаныхаа дараа Fox News-т ярилцлага өгөхдөө эхний ээлжид зэвсгийг ашиглалтаас гаргах ажиллагаа эхэлж, дараагийн 60-90 хоногт газар доорх хонгилуудыг хаах ажил урагшилна гэж найдаж байгаагаа илэрхийлжээ.
Кушнер Израильд очихоосоо өмнө Египетэд ХАМАС-ын удирдлагын төлөөлөлтэй уулзсан байна. Тэрбээр ХАМАС зэвсгээ хураалгахтай холбоотой амлалтаа бодит үйлдлээр харуулах шаардлагатайг мэдэгдсэн бөгөөд эс биелүүлбэл Израиль цэргийн ажиллагаагаа үргэлжлүүлэхэд АНУ болон бусад түншээс илүү хүчтэй дэмжлэг авах болно гэж анхааруулжээ.
АНУ-ын дэвшүүлсэн төлөвлөгөөнд Газын зурвасыг цэрэггүйжүүлэх, ХАМАС-ын зэвсгийг хураах, цэргийн зориулалттай дэд бүтэц болон хонгилуудыг устгах асуудал багтаж байгаа юм. Гэвч уг төлөвлөгөөг хэрэгжүүлэх дарааллын талаар талуудын байр суурь зөрүүтэй хэвээр байна.
Израилийн тал ХАМАС бүрэн зэвсгээ хураахаас өмнө Газын зурвасаас цэргээ гаргахгүй гэсэн байр суурьтай байгаа бол ХАМАС Израилийн цэргийн ажиллагааг зогсоож, цэргээ татах асуудлыг эн тэргүүнд тавьж байна. Кушнерийн хоёр өдрийн уулзалтуудын дараа ч энэ үндсэн зөрүүг арилгасан тохиролцоонд хүрээгүй гэж Reuters мэдээлжээ.
Кушнер мөн Газын зурвасыг цэрэггүйжүүлэхээс өмнө өргөн хүрээний сэргээн босголтыг эхлүүлэхгүй гэсэн АНУ-ын байр суурийг илэрхийлсэн байна. Үүний зэрэгцээ Израильд бодит аюул тулгарсан нөхцөлд өөрийгөө хамгаалах эрхийг нь АНУ хязгаарлахгүй гэж мэдэгджээ.
Уулзалтын үр дүнд Газын зурвасын аюулгүй байдал, зэвсэг хураах асуудал, мөн дэд бүтэц, нийгмийн эрүүл мэндийн асуудал хариуцах хоёр ажлын хэсэг байгуулахаар тохирсон ч энхийн төлөвлөгөөг хэрэгжүүлэх талаар талууд эцсийн тохиролцоонд хүрээгүй байна.
Дэлхий нийтээр..
Иран АНУ-ын цэргийг Ормузын хоолой, Персийн буланд нэвтрүүлэхгүй гэв
Ираны Зэвсэгт хүчний Ерөнхий командлагч Амир Хатами АНУ-ын цэргийн хүчнийг Персийн булан, Оманы булан болон Ормузын хоолойн бүсэд эргэн байршихыг Иран зөвшөөрөхгүй гэж мэдэгджээ.
Хатами наймдугаар сарын 16-нд Тегеранд болсон арга хэмжээний үеэр сэтгүүлчидтэй уулзахдаа АНУ-ын цэргийн хүчийг бүс нутгаас шахан гаргах нь нэгэнт бодит болсон гэж мэдэгдсэн байна. Тэрбээр АНУ-ын цэргийн бааз, хүчний байрлал өмнөх байдалдаа эргэн орох боломжгүй бөгөөд Иран үүнийг зөвшөөрөхгүй гэсэн байр суурь илэрхийлжээ.
Энэ мэдэгдэл АНУ-ын Ерөнхийлөгч Дональд Трамп Ормузын хоолойн хяналтын талаар удаа дараа хатуу байр суурь илэрхийлж буй үед гарч байна. Трамп наймдугаар сарын 12-нд АНУ Ормузын хоолойг “бүрэн хянаж байгаа” гэж мэдэгдсэн бол наймдугаар сарын 14-нд Ираныг ялсны дараа тус хоолойг АНУ-ын нутаг дэвсгэр болгон зарлах тухай ярьсан юм.
Хатами Трампын мэдэгдлийг няцааж, Ормузын хоолой дахь Ираны байр суурийг хамгаална гэдгээ илэрхийлжээ. Түүний мэдэгдэлд АНУ-ын цэргийн хүч бүс нутагт эргэн байрших аливаа оролдлогод Иран хатуу хариу үзүүлнэ гэсэн агуулга багтсан байна.
Түүнчлэн Хатами АНУ-ын цэргийн алба хаагчийг байлдааны нөхцөлд хөнөөсөн эсвэл олзолсон тохиолдолд 30 мянган ам.долларын шагнал олгохоо мэдэгдсэн байна. Ираны төрийн мэдээллийн хэрэгслүүдийн мэдээлснээр шагналын хөрөнгийг иргэдийн хандиваар бүрдүүлэх бөгөөд эмэгтэй хүн ийм үйлдэл хийсэн тохиолдолд шагналыг хоёр дахин нэмэгдүүлж, 60 мянган ам.доллар болгоно гэжээ.
Ормузын хоолойн хяналт АНУ, Ираны хоорондын сөргөлдөөний гол асуудлын нэг хэвээр байна. Трампын засаг захиргаа АНУ-ын Тэнгисийн цэргийн хүчин хоолойг хянаж байгаа гэж мэдэгдэж байгаа бол Ираны тал стратегийн усан зам дахь өөрийн байр суурийг хадгалсаар байна. Наймдугаар сарын 18-ны байдлаар ч талуудын байр суурь зөрүүтэй хэвээр бөгөөд Ормузын хоолойн хөдөлгөөн бүрэн хэвийн болоогүй байна.
Дэлхий нийтээр..
Путин гадаадад гарч, ял шийтгэлээс зайлсхийсэн иргэдийн хөрөнгийг битүүмжлэх хуульд гарын үсэг зуржээ
ОХУ-ын Ерөнхийлөгч Владимир Путин гадаадад байгаа бөгөөд Оросын шүүхээс оноосон ял шийтгэлээс зайлсхийж буй иргэдэд тодорхой хязгаарлалт тогтоох тухай хуульд 2026 оны зургаадугаар сарын 10-нд гарын үсэг зуржээ. Шинэ хууль 2026 оны есдүгээр сарын 1-нээс хүчин төгөлдөр хэрэгжиж эхэлнэ.
Шинэ зохицуулалтаар гадаадад байгаа ОХУ-ын иргэн хуульд заасан тодорхой гэмт хэрэгт холбогдож, шүүхийн шийдвэрийг биелүүлэхээс зайлсхийсэн тохиолдолд түүний ОХУ дахь хөрөнгө, эд хөрөнгийг битүүмжлэх болон бусад хязгаарлалт хэрэглэх эрх зүйн боломж бүрдэж байна.
Хууль нь ОХУ-аас гадаадад гарсан бүх иргэнийг хамруулахгүй. Мөн Украины дайн эхэлснээс хойш эх орноосоо явсан хүмүүсийг нийтээр нь иргэншлээс хасах зохицуулалт биш юм.
Харин гадаадад байгаа бөгөөд ОХУ-ын хууль тогтоомжид заасан тодорхой гэмт хэрэгт холбогдсон, шүүхийн ажиллагаа болон оноосон шийтгэлээс зайлсхийж буй иргэдэд дотоодод байгаа хөрөнгө, эд хөрөнгөөр нь дамжуулан хязгаарлалт тавих боломжийг өргөжүүлжээ.
Уг хуулийг ОХУ-ын Төрийн Дум тавдугаар сарын 26-нд баталж, Холбооны зөвлөл зургаадугаар сарын 3-нд дэмжсэн бөгөөд Ерөнхийлөгч Владимир Путин зургаадугаар сарын 10-нд гарын үсэг зурсан юм. Хуулийн үндсэн зохицуулалтууд есдүгээр сарын 1-нээс хэрэгжиж эхлэхээр тусгажээ.
ОХУ 2022 онд Украинд цэргийн ажиллагаа эхлүүлснээс хойш олон тооны иргэн гадаадад гарсан бөгөөд Москва гадаадад байгаа Оросын иргэдийн хууль зүйн хариуцлагатай холбоотой зохицуулалтаа үе шаттайгаар чангатгаж ирсэн юм.
Гэхдээ гадаадад амьдарч байгаа явдал өөрөө хариуцлага хүлээлгэх үндэслэл болохгүй бөгөөд хуульд заасан гэмт хэрэг, шүүхийн ажиллагаанаас зайлсхийсэн зэрэг тодорхой нөхцөл бүрдсэн тохиолдолд шинэ зохицуулалтыг хэрэглэхээр байна.
