Дэлхий нийтээр..
Ливан улсын төв банкны авлигын хэрэгт холбогдуулан 12 банкийг шалгаж байна
Швейцар улсын санхүүгийн зохицуулагч байгууллага 12 банкийг шалгаж, хоёр банкинд нь олон жил төв банкны даргаар ажиллаж байсан Риад Саламегийн авлигын хэргээр эрүүгийн хэрэг үүсгэсэн гэж даваа гарагт мэдэгдлээ.
Ливан улсын эрх баригчид олны анхаарлыг татсан хэргийг олон сараар хойшлуулсны эцэст Салеме, түүний дүү Ража болон түүний туслахуудын нэгийг мөнгө угаасан, завшсан, хууль бусаар хөрөнгөжсөн хэргээр пүрэв гарагт буруутгасан юм.
Саламе ба түүний дүү энэ үйл явцын туршид буруутай үйлдлээ няцааж байсан. Тэрээр өнгөрсөн пүрэв гарагт Ройтерс агентлагт өгсөн ярилцлагадаа өөрийгөө гэм буруугүй гэдгээ хэлэхийн зэрэгцээ шалгаж байгаа явдал нь "яллах дүгнэлт биш" гэж мэдэгдээд, шүүхийн журмыг дагаж мөрдөхөө амлажээ.
Саламе болон түүний дүү Ража нар 2002-2015 оны хооронд Төв банкнаас 300 гаруй сая доллар завшсан эсэхийг Ливан улс 18 сарын турш шалгасны үр дүнд буруутгаж байгаа юм.
Швейцарийн Санхүүгийн зах зээлийн хяналтын газар (СЗЗХГ) уг хэрэгтэй холбоотой мөнгө угаасан гэх хэргээр 12 банкийг шалгаснаа даваа гарагт мэдэгдлээ.
"Ливан улсын хувьд СЗЗХГ ойролцоогоор арав гаруй банкинд шалгалт хийсэн ба эдгээрээс хоёрт нь шийдвэр гүйцэтгэх ажиллагааг эхлүүлсэн" гэж хэвлэлийн төлөөлөгч хэлэв.
СЗЗХГ нь банкинд гарсан доголдлыг илрүүлж, юу нь буруу болсныг тогтоох, цаашид мөнгө угаахтай холбоотой журмыг зөрчихөөс урьдчилан сэргийлэхийн тулд ямар арга хэмжээ авах шаардлагатайг тогтоох зорилгоор гүйцэтгэх ажиллагааг хэрэгжүүлдэг.
Ноцтой тохиолдолд СЗЗХГ нь банкуудад арга хэмжээ авч, гэмт хэргийн шинжтэй зөрчилд сэжиглэгдсэн тохиолдолд Швейцарийн холбооны прокурорт шилжүүлж болно.
СЗЗХГ энэ хэргийн шийдвэр гүйцэтгэх ажиллагааны мөн чанар болон холбогдох банкуудын талаар тайлбар өгөхөөс татгалзсан.
Ах дүү Саламе Их Британийн Виржиний арлуудад бүртгэлтэй оффшор компани Форри Ассосиэт -ээр дамжуулан Швейцарийн банкны данс руу 330 сая ам.доллар шилжүүлсэн гэж Швейцарийн СоннтагсЦайтунг сонин мэдээлэв.
Мөн Европын холбооны хэд хэдэн оронд үл хөдлөх хөрөнгө худалдаж авахад их хэмжээний мөнгө зарцуулсан гэж мэдээлсэн.
Эйч Эс Би Си банкны Женевийн салбар дахь Ража Саламегийн хувийн дансанд 250 сая долларын орлого орсон гэж тус сонинд бичжээ. Бусад мөнгийг ЮБС, Кредит Сюсси, Жулиюс Баер, ИФЖ, Пиктет зэрэг банкинд байршуулсан гэж нэмж мэдээлсэн.
Жулиюс Баер, ЮБС, Эйч Эс Би Си, Кредит Сюсси зэрэг банкууд Ройтерс агентлагт тайлбар өгөхөөс татгалзсан байна.
Эх сурвалж: https://www.reuters.com
Дэлхий нийтээр..
НҮБ дайн үргэлжилбэл дэлхийд өлсгөлөн нэмэгдэх эрсдэлтэйг анхааруулав
НҮБ-ын Дэлхийн хүнсний хөтөлбөр (WFP)-өөс 2026 оны дөрөвдүгээр сарын 16-ны өдөр гаргасан мэдэгдэлд дурдсанаар, Ойрхи Дорнодын бүс нутагт үүсээд буй хурцадмал байдал, ялангуяа Ирантай холбоотой зөрчил үргэлжилбэл дэлхийн хэмжээнд нэмэлт 45 сая хүн хурц өлсгөлөнд нэрвэгдэх эрсдэлтэй байгааг анхааруулжээ.
Энэ талаар НҮБ-ын Дэлхийн хүнсний хөтөлбөрийн Гүйцэтгэх захирал Синди Маккейн анхааруулахдаа, геополитикийн хурцадмал байдал нь дэлхийн хүнсний аюулгүй байдалд ноцтой дарамт учруулж байгааг онцолсон байна.
Тус байгууллагын мэдээлснээр, дайн, зөрчил нь зөвхөн тухайн бүс нутагт төдийгүй дэлхийн хүнсний хангамж, тээвэр логистик, эрчим хүчний зах зээлд шууд болон дам нөлөө үзүүлж байгаа аж. Үүний улмаас хүнсний бүтээгдэхүүний үнэ өсөх, нийлүүлэлт тасалдах, эмзэг эдийн засагтай орнуудын худалдан авах чадвар буурах зэрэг сөрөг үр дагавар нэмэгдэх төлөвтэй байна.
Одоогийн байдлаар дэлхий даяар хэдийнэ олон сая хүн хүнсний хомсдолд өртөөд байгаа бөгөөд дээрх нөхцөл байдал үргэлжилбэл энэ тоо цаашид огцом нэмэгдэх эрсдэлтэйг НҮБ онцолсон байна. Иймд олон улсын хамтын нийгэмлэгийг зөрчлийг намжаах, хүмүүнлэгийн тусламжийг нэмэгдүүлэх, хүнсний хангамжийг тогтвортой байлгахад анхаарахыг уриалжээ.
Шинжээчдийн үзэж буйгаар, геополитикийн тогтворгүй байдал нь дэлхийн эдийн засаг, ялангуяа хүнсний аюулгүй байдалд мэдэгдэхүйц нөлөө үзүүлж байгаа бөгөөд ойрын хугацаанд энэ чиг хандлага үргэлжлэх төлөвтэй байна.
Дэлхий нийтээр..
Хиймэл оюунд суурилсан технологийн хөгжил хурдасч, дэлхийн өрсөлдөөн шинэ шатанд хүрэв
Сүүлийн жилүүдэд хиймэл оюунд суурилсан технологийн хөгжил эрчимжиж, дэлхийн томоохон компаниудын өрсөлдөөн шинэ шатанд хүрлээ. Үйлдвэрлэл, тээвэр, мэдээллийн технологийн салбарт автоматжуулалт, ухаалаг системийн хэрэглээ эрс нэмэгдэж, хүний оролцоог багасгах чиг хандлага давамгайлж байна.
Хиймэл оюуны шинэ үеийн загварууд илүү нарийвчлалтай, хурдтай ажиллах чадвартай болж, их хэмжээний өгөгдлийг богино хугацаанд боловсруулах боломжийг өргөжүүлэв. Энэ нь бизнесийн шийдвэр гаргалтад шууд нөлөөлөх хэмжээнд хүрчээ. Жолоочгүй тээврийн хэрэгсэл, роботжуулсан үйлдвэрлэл бодит хэрэглээнд улам ойртож, туршилтаас хэрэглээ рүү шилжих үе шат идэвхжив.
Нөгөө талаас дата төвүүдийн хүчин чадал нэмэгдэхийн хэрээр эрчим хүчний хэрэглээ өсөж, байгаль орчинд үзүүлэх нөлөөллийн асуудал олон улсын анхаарлын төвд орж байна.
Мөн технологийн энэ хурдац хөдөлмөрийн зах зээлд өөрчлөлт авчирч, зарим ажлын байр буурч, шинэ ур чадварын эрэлт нэмэгдэх нөхцөл бүрдэв.
Иймээс улс орнууд технологийн бодлогоо шинэчилж, инновац, хүний нөөцийн бэлтгэлийг чухалчлах шаардлага улам тодорч байна.
Дэлхий нийтээр..
“Al Jazeera”-гийн сэтгүүлч амь үрэгдсэнд эмгэнэл илэрхийллээ
Газын зурваст ажиллаж байсан Al Jazeera телевизийн сэтгүүлч Вишах Израилын цохилтын үеэр амь үрэгдсэн талаар олон улсын хэвлэлүүд мэдээлж байна. Мэдээллээр, сэтгүүлч Вишах Газын зурваст болж буй үйл явдлыг сурвалжилж байх үед цохилтод өртсөн бөгөөд хамт ажиллаж байсан хэвлэл мэдээллийн ажилтнууд түүнийг эмгэнэн хүндэтгэл үзүүлжээ.
Газын сэтгүүлчид болон хэвлэл мэдээллийн байгууллагууд:
- Сэтгүүлчдийн аюулгүй байдлыг хангахыг
- Сурвалжлагчдыг онилохгүй байхыг
- Олон улсын байгууллагууд анхаарал хандуулахыг уриалсан байна.
Al Jazeera телевизийн зүгээс сэтгүүлчийн амь үрэгдсэнд эмгэнэл илэрхийлж, мөргөлдөөний бүсэд ажиллаж буй сэтгүүлчдийн аюулгүй байдлын асуудал улам ноцтой болж байгааг онцолжээ.
Сүүлийн саруудад Газын зурваст хэд хэдэн сэтгүүлч амь үрэгдсэн талаар олон улсын байгууллагууд анхааруулж байгаа бөгөөд хэвлэл мэдээллийн ажилтнууд мөргөлдөөний бүсэд хамгийн өндөр эрсдэлтэй нөхцөлд ажиллаж буйг тэмдэглэж байна.
Ойрхи Дорнодын нөхцөл байдал хурц хэвээр байгаа бөгөөд Газын зурваст агаарын цохилт, хуурай замын ажиллагаа үргэлжилсээр байна.
-
Тод зураг2019/09/26
Улаанбаатарт өдөртөө 27 хэм дулаан
-
Хэн юу хэлэв...2024/08/20
Л.Хосбаяр: Монголын старт-апууд Японы технологийн салбарынхантай хамтрах боломж ...
-
Дэлхий нийтээр..2023/08/09
Авто замыг хүчитгэх, эвдэрсэн зам талбайг засварлах, сэргээн босгох ажил үргэлжи...
-
Үйл явдал2021/12/06
Та өөрт ойр вакцины аль ч цэгт очиж дархлаажуулалтад хамрагдаарай